مدرب ومعالج بالتنويم الإيحائي
التكوين العكسي هو حيلة دفاعية بيستخدمها الشخص بشكل لاواعي علشان يحمي نفسه من مواجهة الواقع المؤلم واللي مش هتقدر الايجو او الانا الخاصة بيه انها تستحمله.
وفيه بنعظم جدا الشخص وبنبدأ نوصفه بعكس اللي احنا حاسينه تماما.. فمثلا انت بتكره شخص ما علشان هو غبي مثلا ، وأول ماتشوفه تبدأ توصفه وتعظم فيه عكس الصفة اللي انت بتكرهها فيه فتقوله “يا برميل النباهة يا ترعة المفهومية وبعد كده بتستغرب نفسك هو انا ليه عملت كده؟
ببساطة انت مكنتش تقدر تقوله “انت غبي” او “انت ظالم” او “ربنا ياخدك” لاكتر من سبب ، يمكن خايف على نفسك او على عيلتك او على حياتك او على شغلك او حتى مش عايز تعمل مشاكل.. الخ الخ
أغلب مشكلات العملا مع العلاقات بتنحصر في النقطة ديه
طرف فيهم مش قادر يعترف بكرهه لصفة معينة في الطرف التاني ، وبدل مايواجهها بيبدأ انه يعظم عكسها في الطرف الاول
انت كريم جدا وهو بخيل انت مفيش منك اتنين وهو مبيفهمش / او هي
الغريب في الموضوع ان استخدامنا للحيلة الدفاعية بيكون بغرض الكبت ، فتخيل انك تكبت وكمان تظهر عكس المكبوت طول الوقت لانك عايز تحافظ على شغلك..
كيف تعرف ان حد بيمارس التكوين العكسي معاك؟
1- بيتميز اصحاب التكوين العكسي انه غالبا بيعلوا صوتهم بدرجة اعلى عن الطبيعي لما يبدأوا يجاملوك . يعني بيعلوا صوتهم بمبالغة وهما بيقولوا “انا بحبك جدااااااا” انت ازااااااي جميييييل كددددداااااه”
وكانهم بيحاولوا يخفوا الصوت الداخلي المقاوم ويضعفوه لانهم مش قادرين لاي سبب يواجهوا الواقع.
2- التكرار، بيكرر المجاملة اكتر من مرة كل لما يشوفك وغالبا بيستخدم نفس الكلمات .
3- معندوش مبرر حقيقي للمجاملة
4- بيتك عالسين : يعني بتلاقي نبرة صوته مع انها عالية بس فيها شعور مختلف .. “انا بحبك” بتتقال كانه بيقولك “انا شايل منك” ، كلمات مختلفة بس نبرة صوت واحدة تقريبا .. لغة الجسد بتعبر عن الرسالة اللاشعورية الحقيقية .. يعني تلاقيه عامل قبضة بإيده مثلا ووشه محمر وبيقولك “انا بحبكككككككك ياااا اخيييي” تعبيرات وش وجسد حد عايز يضربك بوكس.
التكوين العكس ممكن يكون تجاه النفس .. كيف؟
علشان الشخص ميقدرش يواجه نقص جواه او خطأ .. بيبدأ يظهره ويشدد عليه ويعبر عن جماله او ذكائه او او او .. فتستغرب منه بس هو مش هيعترف مثلا انه اقل في الذكاء فيبدأ يقول بينه وبين نفسه او يقول للناس “انا ذكي واجمد حد في الدنيا والناس بتحبني جدا”
التعامل مع اصحاب التكوين العكسي؟
1- خاف منه جدا وابدأ افهم ايه اللي ورا الرسالة ديه لانها ممكن تكون خطر على حياتك.
2- فاكر مقولة “الطعنة اللي بتيجي من اقرب الناس ليك؟ ” اهم دول بيكونوا اقرب الناس ليك ، وانت لو مفهمتش بدري هتلاقي مصيبة حصلت بعدين وساعتها هتستغرب طول عمرك هو ده حصل ازاي
3- اقعد مع الشخص وعبرله عن اسفك واعتذارك لانك كنت فاهمه غلط وقوله يسامحك لو فيه اي حاجة ضايقته منك.بس انت مكنش قصدك وكلمه عن ظروفك وخليه يفهم ان حياتك فيها مشاكل مش وردية زي ماهو متخيل.
4- لو انت معالج او ممارس للتنويم الايحائي استخدم ال STEMS مع العميل.
التحدي؟
التحدي انك انت تعرف انك بتمارس التكوين العكسي ، لانك غالبا مش هتكون واخد بالك. ايوة مش هتكون واخد بالك بس لو لاقيت نفسك بتطبل لحد وبتجامل شخص اكتر من اللازم بدون اسباب فعليه ، ابدأ روح لمتخصص ولو انت واعي كفاية ، امسك ورقة وقلم واسال نفسك “لو انا شايل منه ، هكون شايل منه ايه؟ وابدأ اعمل خطة علشان تساعد نفسك تتخلص من المكبوت اللي جواك اما بالاعتراف او بتغيير الاطر.
وفي النهاية .. متخافش من حد “بينتقدك” لانه غالبا سوي نفسي كفاية علشان يعبر عن مشاعره ناحيتك واللي هو شايفه صح، طبعا الانتقاد لو تطرف وبقى عدواني هندخل في حيلة دفاعية جديدة ، بس الشكل المتوازن منه سوي ، اما لو لاقيت حد “بيطبلك” خاف منه وابعد ، لانك لو غفلت عنه ممكن لاواعيا ياخد خطوة حقيقية ضدك او غالبا هينقلب عليك ويفرغ مشاعره تجاهك عن طريق انتقاد لاذع وهيروح يطبل لحد تاني غيرك “المنافس بتاعك”
