الألفا هو الملك المتحكم في صمت … هو القادر على توجيه القطيع بابتسامة ، هو ملك الغابة او ملك المكان اللي بيكون فيه .. مبيعملش مجهود علشان يكون ألفا .. هو بيتواجد وبشكل تلقائي كل الناس بتبدأ تقلده ، تمشي وراه ، توافق على رأيه وتحارب علشانه من غير ما يطلب ..
الألفا هو شخص قادر بشكل لاواعي على التوجيه بشكل لاواعي بدون اتفاق مسبق ..
في الدورات التدريبية والمحاضرات، دايما فيه ألفا وسط الحضور، شخص غالبا ساكت ، محاط بغموض ما، ويمكن يتجنبه الناس كمان ، بس في نفس الوقت عنده القدرة على توجيه الناس ، ومشاعرهم ورأيهم بدون ما ينطق بكلمة..
هو الشخص اللي المحاضر، بشكل تلقائي بياخد منه “موافقة” ، “تأكيد” .. من خلال نظرات مستمرة موجهة تجاهه ، عنده قدرة على اصطياد عيون المحاضر وهو بيتكلم فتلاقي المتحدث وهو بيتكلم، باصص في اتجاهه ، ومع اول حركة رأس بالموافق من جهة الألفا، بيتحمس المدرب / المحاضر وبيكمل كلامه.
بيستمر المدرب في الحصول على دعم الألفا لدرجة ان المحاضر بيكتشف ان لو الألفا ضحك .. باقي الناس هتبصله وتضحك معاه، ولو اتضايق من التكييف كل الناس هتبدأ تعلق علي التكييف في القاعة.
علشان كده المدرب الواعي والفاهم بيكسب الألفا لإنه عارف ان لو كسب الألفا هيكسب المجموعة.
الألفا هو الشخص اللي بيكون وسط مجموعة من الناس ، وبيفتح موضوع فتلاقي كل الناس بدأت تتكلم في الموضوع ده .. ولو غير الموضوع ، الكلام كله بيتغير .. هو مش محتاج يتكلم اكتر ما هو بيوجه .. بيقول كلمة وبيسيب الجمهور يكمل.. هيقول رأيه فيلاقي الناس بتهلل ، هيرفض فهتلاقي الناس بترفض وبتبرر ، ولو وافق بعد رفض ، الناس هتبدأ تعيد نظر في رأيها وتتبعه. لو ضحك الناس هتضحك وتفرح ولو اتضايق هتعم الكأبة على المكان.
الألفا ممكن يكون راجل او ست ، وممكن في نفس المكان يكون فيه اكتر من ألفا ، بيتنافسوا وهما مش عارفين ، تخيل يبقى فيه اكتر من ملك للغابة في غرفة واحدة ، تخيل هيعملوا ايه في بعض؟ أعظم ألفا فيهم هيقدر يخليهم يتبعوه والغريب ان كل ده هيحصل بدون ترتيب مسبق..
كيف تصبح ألفا في 7 خطوات ؟
1- لما تكون ساكت اغلب الوقت وبتقول جمل مختصرة جدا
2- لما تحاوطك معلومات ناقصة وبيحاول الناس يكملوها بلاوعي
3- لما بيكون ليك عادات روتينية خاصة مستمرة في المكان اللي انت فيه
4- لما تكون يقظ ومركز مع عيون الناس ، اللي بيبص في العيون هو ألفا تلقائي. هو ملك مش خايف ..
5- لما تبني ألفة مع كل شخص بيشوفك لوحده .. وبتقلل تواجدك وسط المجموعة ومع ذلك بتتفاعل مع كل فرد بلطف واهتمام ودعم..
6- لما تقف للحق ، وتقول اللي غيرك مش هيعرف يتكلم عنه
7- لما تكون مش مخطط انك تكون ألفا!
وافتكر ان الألفا غالبا مش عارف انه ألفا ، والقطيع غالبا مش عارف انه بيتبع الألفا .. لكن لو حد فاهم وبيبص من بعيد هيعرف الألفا .. هيكسبه ، هيسبقه بخطوة علشان ياخد مكانه في المملكة .
