مدرب ومعالج بالتنويم الإيحائي
التضحية هي معنى ومفهوم مقدس قبل ما تكون مجرد مظهر ديني متمثل ومتمركز حوالين دبح الحيوانات والتفاخر بنوعية الذبيحة ..
سيدنا ابراهيم ضحى بحياته علشان يلاقي ربنا ، وهدم اصنام الكفار وهو عارف انه هيتقتل ومع ذلك ساب نفسه ، وحفروا حفرة كبيرة فيها نار ورموه فيها – وكان ممكن طول الوقت يرجع عن قراره ويعتذر- بس هو استمر في خطته لحد ما نجح .. عارف نجح في ايه؟ منجحش في انه يدعوا الكافرين ، هو اصلا مكنش عارف ولا جاتله الرسالة .. هو لما فشل في انه يلاقي ربنا قرر انه يخلي ربنا هو عز وجل اللي يلاقيه ..
ومنها سيدنا ابراهيم هو اول مكتشف لقانون غير مذكور في كتب تطوير الذات : لو معرفتش تلاقي اللي انت عايزه .. خلي اللي انت عايزه يلاقيك .. وعلشان يشوفك لازم تضحي بنفسك علشانه وفي سبيله بصدق تام وبجهل خالص وبشغف مكتمل..
التضحية لما حصلت مع سيدنا اسماعيل ، كانت تضحية بالنفس ، كاملة ومكتملة ، واستعد سيدنا اسماعيل للذبح ورقد ووجهه في الارض وحصلت المعجزة وفداه ربه بذبح عظيم ..
ومن نسل سيدنا اسماعيل جاء سيدنا محمد صلى الله عليه وسلم خاتم الانبياء والمرسلين.
كل نتيجة في الدنيا صاحبها بدأها بتضحية
يمكن تضحية بوقت ، بناس ، بهوايات ، بأصحاب ، بفكرة ، بأكلة أو باعتقاد ..
التضحية هي وضع “الإيمان اللامشروط” في موضع الأهمية القصوى والعظمى واستعداد صاحب الايمان و بقلب سليم ونية صادقة على التضحية بالمعوقات في ثانية في سبيل تحقيق هدف أعظم .. (هو نفسه ميعرفوش)
التضحية تلتزم الايمان الكامل بالرسالة الاعظم بدون شروط .. من غير حتى اشارات ! ايمان صافي وكامل وغير مشروط .. ايمان وعلم عميق بوجوب وجود النتيجة مهما كانت غير واضحة او حتى غير معروفة.. ايمان سيدنا موسى وهو بيضرب بعصاه البحر وارادة سيدنا اسماعيل وشغف سيدنا ابراهيم وصدق سيدنا محمد .
وبعد كل تضحية بتحصل نتيجة عظيمة .. والتضحية تطلب ارادة مش علاج اولا ثم الارادة .. بتبقى عارف انك “مش قادر” وعدم قدرتك مبتخليهاش تقف في سكتك .. زي اللي قرر انه يبطل اكل هو بيحبه ويبدأ ياكل غير صحي مثلا ، مقعدش يقول ولا يسأل ولا يحاول يتعالج .. هو بمنتهى البساطة خد القرار وترك وضحى باللي بيحبه من اجل حتى نتيجة هو ميعرفهاش ومش فاهم هيوصلها ازاي.
اسأل نفسك : انا هضحي بإيه؟
ايه اللي بيضيع وقتك؟ ايه اللي بيحطك في دايرة الراحة بينسيك هدفك ومهمتك؟ ايه الصح اللي انت هتلتزم بيه وايه الخطأ اللي انت هتضحي بيه؟
كن باحث عن الحقيقة ..
وانسى تماما انك تحط هدف ورا كل ده .. وجود الهدف هيضيق الاحتمالات .. ضحي واستمر وامشي واثبت نفسك وساعتها “هيشوفك” وهتلاقي نفسك في المكان المناسب اللي انت محددتوش من البداية
