يعني ايه زوحليقة؟
الزوحليقة هي لعبة فيها شخص بينزل من مكان عالي على ارتفاع ما ، على ارض ناعمة وبيبدأ يتحرك في اتجاهات مختلفة لحد ما يوصل للقاع.. او للارض ..
الزوحليقة اللي اقصدها هنا في المقال هو زوحليقة الحياة .. شخص برضه كان على ارتفاع عالي وفي مكان مختلف تماما وفجأة يلاقي نفسه في مكان او وصل لنتيجة هو مخططلهاش في البداية.
الزوحليقة صامتة وساكنة ولا يمكن ادراكها .. انت فجأة بتلاقي نفسك عليها .. مع اول لحظة بتنسى فيها مكانك او ارضك .. بتتحرك الزوحليقة بيك لأي اتجاه انت عمرك ما هتتخيله.
هل بنتزحلق في العلاقات؟
انت اتزحلقت يا صديقي وتعرف انك اتزحلقت لو لاقيت نفسك دخلت في علاقة وانت شايل كل المبادئ والافكار عن الحياة الزوجية السعيدة وفجأة لسبب ما ، اكتشفت انك بدل ما تعيش العلاقة كما ينبغي انت بتفكر اجيب جبنة تلاجة ولا شيدر!
كم من ناس جميلة بدأوا حياتهم بقصص وردية عن حب افلاطوني عجيب وانتهى بطلاق على أبواب محاكم الاسرة! وتستغرب مع العميل هو ايه اللي وصل الطرفين للنقطة ديه .. والاجابة في كلمة واحدة هي “التنازل”
والغريب ان كلمة “التنازل” فيه ايحاء “النزول” = زوحليقة .. ومع اول تنازل عن مبدء من مبادئك (واللي كان واضح جدا قبل الجواز) بس كده يا صديقي انت ركبت الزوحليقة.. العقل البشري مصمم بالطريقة ديه .. بيقع تجاه حفرة .. واول ما فيه شق في الارض بيفتح … بيكبر في ثانية ومبيتقفلش..
انت اتنازلت عن ان مراتك تهتم بيك وتتصل بيك الصبح مثلا وهتقول “وايه يعني” وهي اتنازلت عن انك تكلمها لما توصل البيت وهتقول “وايه يعني” وشوية شوية هتتنازل عن انه يهتم بيكي اصلا وانت هتتنازل عن اهتمامها بيك.. وفجأة هتكتشفوا انكم كنتوا راكبين الزوحليقة بقالكم سنين ومش عارفين. المشكلة انكم هتعرفوا لما تلاقوا نفسكم خبطتم في القاع وهتفتكروا زمان ومش هتفهموا “هو احنا وصلنا لهنا ازاي”!
هل بنتزحلق في الحياة؟
وما اكثر الجلسات لناس بيأكدولي وبيحلفوا انهم كانوا متميزين جدا عن اقرانهم وفجأة هما اتصدموا بالقاع اللي خبطوا فيه واقرانهم بقوا اصحاب شركات .. !
- بنتزحلق مع الشخص لما يحكي مشكلته
- وبنتزحلق في مشكلته
- وبنتزحلق في محاولة حل مشكلته
- وبنتزحلق تاني وتالت لحد ما فجأة نتفاجئ انها بقت مشكلتنا احنا في النهاية!
بنتزحلق مع ناس كنا فاكرين نفسنا بنساعدهم واحنا مش واخدين بالنا اننا كنا بننزل لتحت وكانوا بيطلعوا على اكتافنا وركبونا الزوحليقة علشان المكان مكنش يستحملنا احنا الاتنين.
هل بنتزحلق في السياسة؟
مش بتكلم في السياسة ومش هتكلم عنها اسف 😌
ولو جيه في بالك اني هتكلم في السياسة تبقى غلطان
ولو افتكرت ان فيه علاقة بين انك تتراضى في الاول وبعد كده تصحى الصبح تلاقي نفسك واخد على دماغك وانت مش فاهم ازاي اتبدل الحال لحال تاني مع كل الوعود ديه وتكتشف انك كنت بتتزحلق .. فغالبا ديه مشكلتك الشخصية بس انا مبتكلمش في السياسة انا اسف
هل بنتزحلق في الوعود؟
بنتزحلق لما يكون فيه اتفاق واضح
وتلاقي الشخص بيقولك “معلش والنبي اصل عندي ظرف طارئ”
وتقول “وايه يعني”
وحبة حبة تلاقي نفسك نسيت اصلا هو الوعد كان على ايه ومضطر انك تستحمل ظروف العالم وانت مش فاهم انت وصلت لهنا ازاي..
فكر يا صديقي واسأل نفسك “انا فين دلوقتي؟”
واسأل نفسك “انا كنت عايز اكون فين”
لو لاقيت نفسك بتقول “انا ايه اللي جابني هنا؟!” او “انا ايه اللي خلاني اتجوز الشخص ده!” او “انا ايه اللي شغلني الشغلانة ديه”
يبقى اعذرني يا صديقي انت كمان اتزحلقت
الغريب يا صديقي ان الشخص وهو بيتزحلق بيكون خايف
بس عارف لما بيوصل للارض بيقول ايه ؟ “هييييه الله تاني تاني تاني”
وبيكمل حياته زحاليق ..
خليك واعي
بقلم نهاد رجب
