فيه كلمات بتدي المعنى وعكسه.. كلمات متحركة في كل الاتجاهات ، تحسها كلمات حية أو كلمات عابرة متحركة أو زمنية حتى لو مكنش ليها معنى زمني مباشر، كلمات محملة بمعاني عن الماضي والحاضر والمستقبل بتدي معاني وبتخلينا نقدر نتنبأ لسنين قدام، هيحصلنا ايه او حصلنا ايه في الماضي.
كلمة زي “فاشل” كلمة جامعة شاملة ، متحركة ، ملازمة وزمنية .. انا فاشل .. بتدي معنى عن الماضي والحاضر والمستقبل ، بتدي معنى عن الشخص ، عن تفكيره وعن سلوكه .. بتفهمنا حاجات عن تصرفاته وميوله ومشاكله ومعتقداته وافكاره ..
كلمة زي “يا بخته” مع انها موجهة لشخص تاني بس بتخلينا نفهم قائلها.. نفهم نفسيته ومشاعره ، بتخلينا نصنع توقعات عن مستقبله وعن قدرته على اتخاذ أي خطوات لنجاحه في الحياة ..
كلمة زي “انا مستحقش” ديه ممكن يتصنع قصص من وراها .. كلها ثلاثية الابعاد الزمنية ، رباعية الابعاد المكانية ، لا نهائية الابعاد الشخصية والفكرية.
عايز تكون شاطر في الموضوع ده ؟ خليني اقولك السر ..
دور على أول كلمة بيقولها الشخص بعد كلمة “أنا” .. وجمعهم جمب بعض .. اكتبهم على ورقة أو احفظهم في عقلك ، بس جمعهم .. وبعد كده اطلب منه انه يقول كل الكلمات جمب بعض ويسبقهم ب “أنا” .. هيتفاجئ جدا من نفسه .. هيقول حاجة زي “أنا فاشل مستحقش بتخنق بيتضحك عليا بسهولة شرير طيب اكتر من اللازم” وقوله يكرر الجملة اكتر من مرة ويركز على كل كلمة فيهم..
“أنا” + استخراج الكلمات الوصفية + تحديد بعدها الزمني أو المكاني + تجميع الكلمات من نفس التصنيف الزمني ، وتجميع الكلمات من نفس التصنيف المكاني ، هتفهم حصل ايه في الماضي ، هتفهم هو متوقع ايه مستقبليا وهتفهم الحاضر بتاعه عامل ازاي ..
مثال :
” أنا فاشل ، أنا عمري ما نجحت الاقي فرصة، الناس بتكرهني ، أنا وحيد ، أنا بغير من الناس، أنا خايف من كل حاجة “
فاشل : زمنية “ماضي وحاضر ومستقبل” مانجحت : رمنية : ماضي بتكرهني : زمنية : حاضر وحيد : مكانية ، حاضر بغير : زمنية : حاضر خايف من كل : مكانية ، وزمنية : حاضر ومستقبل
تعالى نجمعهم (ماضي) : فاشل ، ما نجحت حاضر : فاشل ، بتكرهني ، وحيد ، خايف من كل حاجة مستقبل : فاشل ، خايف من كل .. مكانية : وحيد ، خايف من كل
يعني (في الماضي) ، الشخص ده فشل في انه يلاقي فرص وده (ليه علاقة في الحاضر) بكره الناس ليه من وجهة نظره ، وده خلاه وحيد وخايف من كل حاجة ، ولو استمر كده (مستقبليا) ، هيستمر فشله وهيخاف من كل حاجة ، (ومكانيا) هيفضل دايما وحيد وخايف.
طيب بهذا الترتيب (الماضي ، الحاضر والمستقبل ، المكان) نقدر نفهم ايه اللي حصل زمان ، وازاي مأثر على الآن وشكله مستقبليا ايه .
الخطوة التانية
هنا عرض الجملة بالترتيب للمستفيد علشان يأكد صحتها ثم تغييرها للجملة الانسب من وجهة نظره وبعد كده نقدر نبدأ نغير التشوهات المعرفية عند المستفيد أو استخدام طريقة التدخل المناسبة باستخدام الاسلوب الخاص بيك ( تنويم أو غيره)
طبعا ده مجرد مثال ، الشخص لو قولتله “كلمني عن نفسك” او “احكيلي مالك” هتلاقي الجمل عنده ملخبطة والازمنة متداخلة ، دورنا هنا هو اننا نفصل الكلمات الزمنية والمكانية ونرتبهم ونوريهاله ونحصل على تعزيز ، نغير ده ، ونبدأ نعالج.
ديه تقنية طورتها وبستخدمها في جلساتي وبدربها بشكل اكثر عمقا في كورسات التنويم الايحائي ، سهلة جدا مش صعبة زي ما ممكن تبان قدامك ، في التطبيق هتلاقيها سهلة وخفيفة ومؤثرة جدا .. هي بين ايديك ، استخدمها مع نفسك لو حبيت وقولنا ايه اللي حصل.
طبعا لو عندك علم بالميتا بروجرامز ، صنف الميتابروجرامز ، صنف المايرزبرجز ، رتب الازمنة ، استخرج البرامج العليا ، وملامح الشخصية.. وادمجهم في التقنية لو عندك علم عنهم.
ويومكم اجمل من يومي
